無無聊聊的Christmas

今年Christmas正日本來去個小學同學屋企打邊爐，點知屋主突然要返工，所以就cancel。

Monchhichi爸爸話Christmas日日都有節目，想今日抖吓。我地就去九龍灣食lunch同行下街，之後諗住返屋企。後來Yuki打嚟問買Wii啲嘢，我地知道凱哥唔得閒同佢去，我地就同佢去。

結果我地一行4人(加埋安喬)，就去好景買，可能真係"好好景"嘅關係，比我地買嗰時貴咗。跟住Monchhichi爸爸就話不如去黃金買喎。

黃金真係平過好景喎，當然Yuki梗係滿載而歸啦！！唔單止Wii ，NDS，連Wii Fit都買埋，呢份Christmas Gift真係够份量喇！！

返到佢地屋企，Monchhichi爸爸就幫佢地set機。真係唔該嗮，因為佢地掛住打牌，哈哈！！

Monchhichi爸爸的生日飯

年年都好難諗Monchhichi爸爸既生日飯， 點解？因為佢係Christmas Eve生日囖，到到食飯都好貴，尤其係今年添！！啲人成日話個市好好，真係到到都好貴呀！！Monchhichi爸爸就揀咗食Sushi，不過就要佢去等位先，哈哈！！有好多人等位，我地都等咗差唔多成個鐘。

食完飯行咗陣，就去睇"投名狀"，當然我之前已經online買定飛啦！！去到竟然話套戲要delay，吓？！我都係第一次聽咋！咁咪無得count down囖！！

睇完之後，我同Monchhichi爸爸講以後佢生日都唔好睇啲咁血腥既戲，我記得好似之前就睇過"門徒"......真係大吉利是喇......

睇完都過咗12點，唯有返屋企啦。

Monchhichi爸爸又大一歲喇，Happy Birthday！！

我的生日Party

今年生日同另一個friend一齊搞生日。

好耐都無同佢地一齊玩過喇，今晚都玩得幾開心。

最搞笑就係我收到一個雪人Monchhichi做生日禮物，

但係我屋企已經有2個喇，不過無所謂啦，最緊要佢有我心。

Thank you ！！

生日飯

今年生日前Monchhichi爸爸問我想去邊到食飯，因為舊年佢book嗰間restaurant真係好唔得。咁今年就由我話事，雖然無surprise，起碼係我揀都ok啦。因為我地未去過山頂到食飯，所以我揀咗3間叫佢book，邊間有window seat就book。

12/12 生日嗰日lunch同friend去咗Sogo樓上和三味到食，我地1點幾去到，都唔知點解咁多人唔使返工，包括我地，哈哈！！2點幾都仲有好多人，嗰到啲set由百幾蚊起，我同個friend都點咗sashimi set，啲sashimi都好好味，好新鮮。之後同個friend行街，咁啱Lane Crawford做pre-sale，梗係要去睇下啦，結果我地梗係有出血至走啦！！

行完街，我就去揾Monchhichi爸爸，係中環碼頭到等佢，搭bus去纜車站。嘩？！咩事呀，咁多人買ticket既，排咗一陣，我地問啲staff有八達通係咪唔使排隊，佢話係，點解唔早講呀？之後Monchhichi爸爸打電話話而家去緊，因為我地遲咗少少，嗰時18：45，點知原來Monchchi爸爸話19：30要交枱，吓？！唔係吖嘛？！食45mins，仲要係呢啲地方，趕唔趕啲呀？我就話Monchhichi爸爸，咁趕就唔好book啦。心諗有無搞錯呀，呢啲地方一啲都唔平，唔係茶餐廰，咁趕不如唔好食。Monchhichi爸爸就話問下佢有無其他枱囖。

去到就問個waiter係咪一定要19：30交枱，佢話如果個客嚟到就要，我一路都希望個客no show就好喇！！！個waiter話有第2張無view既枱可以安排俾我地，哎，好過無啦！！

個view真係好靚，好romantic，雖然啲嘢食普普通通，但係個view搭够！！！我地都影咗好多相，Monchhichi爸爸仲帶咗mini脚架添，好搞笑！！

食完飯我地周圍行咗陣，影下相咁就返屋企喇！！

雖然有啲美中不足，但係都多謝Monchhichi爸爸呢一餐birthday dinner！！

我的新店開張喇！

我和朋友合作的新店開張喇！
以小童服裝及用品為主，
請各位入黎睇下啦！

http://hk.auctions.yahoo.com/booth/kidsai

請各位親朋好友多多支持！！！
如無小朋友的，亦請幫忙宣傳一下，感激不盡！！！

謝謝！！謝謝！！

妹妹勁得意！！！！

妹妹越大越得意，我有好多朋友都話佢靚過家姐喎。你地睇下佢真係又肥又cute架，哈哈！！

好慘呀！！！

都唔知點解咁凍同咁乾都會有蚤, 我同Monchhichi爸爸都俾佢地咬咗好多粒。

我一隻脚都成8粒呀，仲要好鬼死痕添呀，所以噚晚去完安喬屋企食飯之後拿拿林去買滅蚤劑，希望work啦，唔work就死喇！！！

大閘蟹宴

11/4 去咗M小姐屋企食大閘蟹。今年係第2次食。

首先去咗太古城到飲茶，嗰間啲嘢一啲都唔好食，不過就勁貴，油菜都要40幾蚊 ！！又唔好食，真係唔底，以後都唔會去。
我地晚餐好豊富。



M小姐媽咪仲幫我地煲埋湯（佢地唔係一齊住架，真係好好既媽咪）。啲大閘蟹都好好味，仲有好多膏添！！我仲將啲蟹肉拆嗮出嚟，一碗俾Monchhichi爸爸，一碗就俾我自己，真係正！！Yummy！！

Eason Concert 2007 ~ (11/3)

今次最衰叫唔到朋友攞飛，所以我地只係買咗$100飛。
Eason真係好厲害，又唱得，又跳得，演戲都好得（題外話）。
佢個show真係好好睇，個stage都整得好特别好靚，同普通concert嗰啲好唔同。

仲有佢帶咗好多message俾大家。

我好想睇多幾次呀！！！！！！！！

越南超hea之旅2007 ~ (10/21-25)

Monchhichi爸爸因為想同佢Daddy，Mommy去一次旅行，我唔想去台灣，泰國嗰啲，就揀咗越南喇。今次我地就揀咗跟團，因為有老人家嘛！！

今次個trip都有波折架，本來book咗9月底去，點知報完團，佢mommy發覺個passport唔够6個月，好彩俾咗嗰啲deposit可以refund咋，如果唔係就慘喇！！之後因為我地要去日本，所以就postpone個trip。

我地搭8：50機出發，但係個escort叫我地6：20去到機場喎，唔係呀嘛？！要2個半鐘頭之前，所以不嬲都唔鍾意跟團，自由行鍾意幾點都OK，總之counter close之前就得啦！！

Call咗的士，先去接2老，然後去機場。我地都遲咗啲，但係個escort都無call我地，梗係預咗啲人遲到。仲有大把時間，就去咗潮樓飮茶，之後就上機。
個團有幾pair後生仔，亦都有老人家。不過有幾個好騎尼，講嘢鬼死咁大聲，嘈到死！！！之後發生啲事仲騎尼。

呢個trip做得最多就係等，食同埋hea。點解嗰個escort同個guide好唔掂囉。個guide就成日話落雨就改第2日先去，因為越南都會成日無端端落雨（就算嗰時好好太陽都會），所以搞到最尾嗰日啲行程超趕，但係之前日日就5點幾食飯，19:00前返到酒店，又唔帶我地出去行下，簡直超級唔掂！！！

有一次佢地book唔到人力車，但係又有好多時間剩，佢地唔諗節目，咁我地就諗叫佢地安排囉，你話係咪好唔掂吖？

講到嗰幾個騎尼怪就真係好激氣，佢地自己聲大夾悪，個個都怕咗佢地。講嘢鬼死咁大聲，連個guide講嘢都聽唔到。自己遟到成半個鐘就唔say sorry，仲要寸其他人，但係其他人遟幾分鐘就講到成架車都聽到。都唔知點解呢個世界上有啲咁既人！！！唉！！！佢地出門真係影衰嗮我地香港人！！！

我都未試過去旅行會想返香港，今次都係第一次，返到香港真係好喇！！！

東京大阪之旅2007 ~Day 8（10/17）

今日係我地一周年，真係話咁快！！
今日啲時間同様過得好快！！點解？？因為我地好趕囉，轉車唔係預咗好多時間。我地首先由大阪去東京，跟住東京去機場，再返香港。今朝一早起身，知道要搭好耐車，加上噚晚無咩食嘢，所以食飽啲，食咩？食定食囉，晨咁早就食飯。




我想買對蛋黄色袜，食完早餐就行咗陣，不過都買唔到，唯有返酒店攞行李去搭車。去到新大阪站，攞住啲行李，新幹綫個platform又遠，搞到我地差啲上唔到車，好驚險！！
去到東京站就去搭Narita Express，Monchhichi爸爸話第一次搭，我都好似係喎，有JR pass就梗係搭express啦！！


到機場就揾嘢食，因為由朝早到而家都係坐車，最尾就食咗蕎麥麪，再買埋啲magazine就上機。


1周年之旅完滿結束喇！！
如果年年都可以去慶祝就好喇！！！（Monchhichi爸爸聽唔聽到呀！！！！！）

東京大阪之旅2007 ~Day 7（10/16）

因為噚日趕唔切去即食麵發明紀念館，今朝食完早餐就出發，點知去到車站，車站入面有個info話今日close喎。吓？！唔係呀嘛，我地好想去o架喎，聽日就要走喇，無時間去喇！！！都無辦法啦，一場嚟到就去紀念館門口影張相囉。

之後就搭車去京都，到京都之後就揾巴士搭去清水寺。

我地喺巴士上面買咗one day pass，每人￥500，好底！！落咗車就跟住啲人行，經過清水坂，嗰到有好多舖頭，我地喺其中一間食咗用抹茶做o既snack，有雪糕，泡芙同埋cheese cake，都幾好味架！！

清水寺果然最出名，今日平日都咁多人嚟。入到去當然要試下“音羽の滝”，據聞飲咗啲泉水會有唔同o既祝福o架，例如有健康，財富，智慧啦。

去完清水寺仲有時間，就諗住去多一個寺，但係有好多寺都好早close，得番銀閣寺係收遲啲同埋近啲，我地就搭車去啦。落車之後，見到一班小學生話快啲跑啦，原來仲有10mins就close喇，我地都係咁走，真係好搞笑。去到嗰啲staff都好好，叫我地17：20出番嚟，都有啲時間行o既。

行完嗮寺，就去行街喇。原來京都都有條好長o既商店街，不過我地實在太餓，就去食sushi，本來諗住只係食少少先，等陣再食過，點知食到唔停口。食飽飽又再去行街，跟住就搭車返大阪。京都個JR車站好靚架，好modern，同京都個image剛剛相反。

可能太早食飯o既關係，返到酒店附近有啲餓，本來想食串燒，但係close咗，咁我地就食たこ焼き（章魚波波），不過嗰間麻麻地，都唔好味o既。

東京大阪之旅2007 ~Day 6（10/15）

晨早8點半食早餐，呢個時間已經係最遲個批，可能太早我都食唔落，食完喺酒店周圍影咗啲相就走喇。

去番之前一晚住嗰間酒店check in，之後就去咗Comme Ca store行，因為唔係on sale都無咩買嘢，只係買咗啲嘢俾安喬同祉言。講開又講，Monchhichi爸爸有日無拿拿大叫祉言個名，仲話好掛住佢添呀，睇嚟唔係只係我，連佢都發埋燒喇！！！
因為搭車嗰時食咗噚晚嗰啲飯團，所以未想食lunch，咁就去咗Sweet Museum嗰到食甜品，不過實在太多choice喇，様様都好想食，結果我就食咗chef’s recommendation ~ pumpkin plate，Monchhichi爸爸就叫咗個 chocolate杯，個賣相好靚架，而且仲好好味添！！

去到大阪當然就要去心齋橋啦，我覺得心齋橋好似吉祥寺咁様，不過長啲囉！！最開心就係我夾到個Monchhichi公仔，仲要夾一次就得啦，幾lucky呀！！雖然個Monchhichi好似copy咁様，但係都勁開心！！

晚餐我地plan咗食河豚，我就揀咗個￥7000既set，Monchhichi爸爸想食sushi，就揀咗個有sushi o既set不過就無河豚。河豚啲肉都幾爽，幾好味。又再一次證明香港人好鍾意去日本同好嘈，間餐廰有9成客都係香港人，我地後面嗰張檯個女人講嘢就鬼死咁大聲！！

食完飯行多陣就諗住去道頓堀商店街到行，點知去到就close咗，唯有去Donki買啲嘢就返酒店。

東京大阪之旅2007 ~Day 5（10/14）

我地一早就check out，點解？因為要去和歌山訓一晚呀！間酒店要10點前check out，仲要唔可以late check out，話要俾錢喎，所以就要早啲起身， check out咗，left埋luggage，就去食早餐，酒店附近有間食burger既，個様好似OK咁，就試下啦，咦，又真係幾好味喎，Monchhichi爸爸話好似Mos Burger咁好味，佢地仲要即叫即整添！！

去到和歌山已經2點幾，就坐巴士去“とれとれ市場”食lunch，嗰到有好多sashimi食架！！

有一檔賣吞拿魚，一面切就一面問啲客要邊part，好似我地喺街市買魚咁様呢，真係好新鮮又可以即刻食，勁正！！我地買咗啲sushi，sashimi，真係好好味！！！Yummy！！！

食完lunch又食ice-cream，都好好味，之後就坐巴士去酒店，巴士啲schedule好疏，啱啱miss咗一班車又要等多9個字先有車，激死！！

落車之後，見到酒店嗰水牌就跟住行，點知行一陣又見到另一個牌，足足見咗4次，行咗成20mins先到，行到我地上氣唔接下氣。酒店個staff離遠見到我地就走過嚟幫手攞嘢，佢仲識得講少少廣東話添！！好搞笑！！！

我地book嗰間房個露台有私人温泉，間房唔錯，酒店環境都好靚，仲有好多個温泉添！！

我地dinner time揀咗19：30食，有成個幾鐘就去咗白濱沙灘行，不過去到天都已經黑嗮，唯有係咁意行下，影下相咁囉。

由沙灘行返酒店又行到我地死死下，最搞笑去到酒店附近啲民居嗰時，有個伯伯問我地去邊，我就話去上面嗰間酒店，跟住佢就話“大変ですね！！”我話係呀，真係好辛苦！！！
晚餐真係好豊富，我地都食唔嗮，最尾嗰個飯唯有打包做飯團。

食完飯返房休息咗一陣就去浸温泉，當然唔係共浴啦。佢地有個絶景温泉，男女都有，2個都係望海，但係我入到去，唔知係咪就收工，佢地落嗮簾，搞到我睇唔到個海。不過Monchhichi爸爸話男嗰面睇到個海，仲要係露天架，幾正呀！！搞錯呀，點解女仔嗰面無既，真係唔fair！！！

東京大阪之旅2007 ~Day 4（10/13）

今日我地出發去大阪，去過日本咁多次，但係都未去過大阪。
我地搭新幹線，Monchhichi爸爸第1次搭，我都係第2次咋，佢話都唔覺得架車好快喎。

去到大阪我感覺好似東京啲人打扮得靚啲。去到酒店check in，嘩間房好大喎，起碼比我expect既大。Monchhichi爸爸都話ok。
之後我地就去揾嘢食，Monchhichi爸爸想食sushi，但係行暈都揾唔到，所以就食定食。

食完lunch就去大阪outlet，因為都幾遠下，所以啲車唔係成日有，等咗成半個鐘先有車，嗰到收8點，我地成6點先去到，得2個鐘頭行。首先就梗係行東京outlet無嗰啲舖頭，例如Beams，Zucca，TC嗰啲，不過Zucca同TC好貴，所以都無買到，但係喺Beams就有買。行到8點幾就走，出到去市中心都成10點，本來我地想食特别啲，但係唔係無位就收咗工，最後又係食拉麵。
哈哈，因為太餓，食到一半先記得影相。